Скачать с ютуб الشيبسي в хорошем качестве

الشيبسي

سنة 1853.. حصلت صدفه تقدر تقول انها غيرت النظام الغذائى والاقتصادى والصحى فى العالم كله.. صدفه كانت بطلتها.. ثمرة بطاطس.. بططسايه سيدى المواطن.. شقلبت الدنيا.. فى السنة دى.. دخل مواطن سعيد زى حضرتك كده.. لمطعم من مطاعم نيويورك علشان ياكل.. يطلب ايه يطلب ايه؟.. طلب بطاطس مقليه.. جاله الطبق واتحط قدامه علشان ياكل.. لكن الراجل وحتى قبل ما يمد ايده فى الطبق.. رفض ياكل وطلب من الجرسون انه يرجعه للشيف.. الطباخ يعنى.. ويقوله ان البطاطس متقطعه بشكل عريض أكتر من اللازم.. وبالتالى مش مقرمشه.. وفعلا.. ياخد الجرسون الطبق ويرجعه للشيف.. فيقوم الشيف يعمل طبق جديد ويقطع البطاطس بشكل أرفع شوية من الطبق الأولانى.. ويتحط الطبق قدام الزبون.. لكن برده الزبون متعجبوش البطاطس.. لسه عريضه ومش مقرمشه.. فيقوم الشيف يُستفز جدا.. ويقرر انه يقطع البطاطس شرايح رفيعه جدا علشان الزبون ميقدرش يعترض.. وفعلا.. مسك السكينة وقعد ينحت فى البطاطسايه لحد ما بقت أرفع من شفرة السكينه نفسها.. اللى هى تقريبا نفس شرايح بطاطس الشيبسى اللى نعرفها دلوقتى.. وطلع الطبق من جديد للزبون.. وكانت المفاجأة سيدى المواطن.. ان الزبون عجبته البطاطس جدا.. وكل الطبق كله.. مش بس كده.. ده طلب بطاطس تانى.. وبعد ما خلصها طلب تالت.. لدرجة ان زباين المطعم لاحظوا اللى بيحصل.. فطلبوا هما كمان نفس البطاطس المقرمشة اللى الراجل ده عمال بياكلها.. وهما كمان عجبتهم البطاطس جدا.. وفى أقل من شهر.. كانت البطاطس الرفيعه المقرمشة دى.. واحده من أشهر الأكلات فى نيويورك كلها.. خصوصا بعد ما اخترعوا مكنة تقشير البطاطس.. فبعد ما كان الطباخ لازم يقشر البططساية وبعدين يقطعها.. بقى الموضوع اسهل.. المكنة بتقشر ومكنة تانية بتقطع.. وبالتالى المطاعم بقت تقدر توفر كمية أكبر من شرايح البطاطس المقلية.. اللى بقت بعد كده الشيبسى.. مين هنا كان واقف مراقب اللى بيحصل؟.. مصانع الأغذية المحفوظة.. المعلبات والذى منه.. شافوا انبهار الناس بشرايح البطاطس وقرمشتها.. فقرروا انهم يعبوها فى أكياس.. ودى كانت نقله أكبر للبطاطس الشيبسى.. لأن ناس كتير لقتها مفيدة جدا فى الرحلات والمناسبات والسهرات.. عندك سهره فى البيت.. كيس الشيبسي اللذيذ.. افتحه بكل سهوله ومد ايدك.. لا محتاج تطبخ ولا تقطع بطاطس ولا تبذل أى مجهود.. وفى نفس الوقت.. طعمها حلو ومقرمشه ومفيش ألذ من كده.. لكن اللى مصانع الأغذية المعلبة مقالتش عليه للناس.. هو ان الشيبسي ده.. فيه سم قاتل.. معقول يا أبوحميد؟.. أقولك أيوه سيدى المواطن.. وخلينى أحكيلك.. لكن قبل ما أحكيلك خلينى أقولك ان فى رواية تانية لاختراع الشيبسي غير رواية الشيف الأمريكي اللى حكيتهالك من شويه.. الرواية التانيه بتقول ان اكتشاف أو اختراع الشيبسي هو اختراع بريطاني فى الأساس.. وكان أو ظهور ليها سنة 1817 على ايد الشيف الانجليزى ويليام كيتشنر.. اللى كتب وصفتها فى كتاب للطبخ.. وقال ان البطاطس بتتقطع شرايح رفيعه جدا.. وبعد كده تتبل بالخل أو الجبنه أو الأعشاب الطبيعيه.. وتتنقع فى اللمون.. وتتقلى بشحم الخنزير.. فدول كانوا روايتين اكتشاف أو اختراع الشيبسي.. تعالا بقى نسأل السؤال المهم.. البطاطس اللى بناكلها دلوقتى دى بتتعمل ازاى؟.. بتتطبخ ازاى يعنى قبل ما تتعبا فى كيس الشيبسى؟.. بداية كده مش أى بطاطسايه ينفع تتقطع شيبسى.. فطوروا نوع معين من البطاطس بتتميز انها طويله.. ليه؟.. علشان تبقى سهله فى تقطيعها وتطلع كلها متساويه فى الشكل.. أو على الأقل شكلها مظبوط.. الميزة التانية انهم زودوا فيها نسبة النشا وقللوا السكر.. النشا العالى بيساعد فى احتفاظها بالنكهه والطعم.. والسكر القليل علشان ينفع تتخزن فترات طويله بدون ما تبوظ.. بعد كده بتدخل مكنة الغسيل تتغسل كويس.. وبعدين تتقطع بشفره رفيعه ومموجه.. فيها تمويجه كده.. وبعد كده بياخدوا الشرايح دى يرموها فى زيت درجة حرارته 190 درجة مئوية.. ولأن درجة الحرارة دى عاليه جدا.. فالمايه الموجودة فى شرايح البطاطس بتتبخر.. طيب بيدخل البططسايه مكان المايه اللى اتبخرت ايه؟.. بيدخل الزيت اللى هى غرقانه فيه.. علشان كده بتلاحظ ان الشيبسايه هشه جدا وسهل تتكسر بسهوله.. وهنا المشكلة.. المشكلة فى الزيوت المهدرجة اللى بيتقلى فيها الشيبسى.. وهنا سؤال.. هى ايه الزيوت المهدرجة دى وايه خطورتها؟.. الزيوت المهدرجة نوع من الدهون اللى بيستخدموها علشان يحافظوا على صلاحية الأكل لفترة أطول.. والهدرجة هنا معناها إضافة الهيدروجين للدهون السائلة، زى الزيت النباتي، علشان يحولوها لدهون صلبة في درجة حرارة الغرفة.. المهم اللى عاوزك تعرفه هنا بعيدا عن التعقيد ده.. ان الزيوت المهدرجة دى بترفع نسبة الكوليسترول الضار فى الدم.. من المصادر https://bit.ly/3t94QiI https://bit.ly/394kF3p https://bit.ly/3mbBfRO #المواطن_سعيد #الشيبسي