Скачать с ютуб معركة رأس العش.. كيف تصدى 30 جندى مصرى لقوة مدرعات ومشاه ميكانيكيه حاولت اقتحام بورفؤاد в хорошем качестве

معركة رأس العش.. كيف تصدى 30 جندى مصرى لقوة مدرعات ومشاه ميكانيكيه حاولت اقتحام بورفؤاد

فى نكسة 67 قدرت القوات الاسرائيلية انها تسيطر على معظم الأراضى فى سيناء.. ماعدا منطقة بورفؤاد.. فالقادة فى الجيش الاسرائيلى.. قالك اشمعنا المنطقة دى يعنى اللى هتفضل بره سيطرتنا.. يلا حركوا القوات وسيطروا عليها.. وفعلا يوم 1 يوليو 1967.. يعنى بعد نكسة 67 بـ 3 أسابيع تقريبا.. اتحركت 10 دبابات اسرائيلية معاها قوة مشاه ميكانيكية فى عربيات مجنزرة.. وطيارة استطلاع.. طيب هنا حضرتك ممكن تسأل سؤال بديهى.. انت دلوقتى كجيش اسرائيلى سيطرت على كمية أراضى مهولة.. ايه اللى فارق معاك فى بور فؤاد؟.. ليه تغامر بتحريك قواتك والاشتباك فى معركة جديدة.. علشان حته أرض صغيرة انت أصلا مش محتاج لها؟.. أٌقولك هى فعلا أرض مساحتها لا تقارن بالأراضى اللى سيطر عليها.. لكن محتاج لها.. محتاج لها فى ايه؟.. هقولك.. لو قدر يسيطر على بور فؤاد.. تبفى مدينة بورسعيد كلها تحت رحمته.. زى ما واضح فى الخريطة اللى قدام حضراتكم كده.. وبالتالى بورفؤاد بالنسبة له موقع استراتيجى مهم جدا.. حلو كده؟.. حلو.. القيادة فى مصر لما عرفت بتحرك القوات الاسرائيلية.. كلفت أقرب قوات مصرية موجودة هناك.. بمنع القوات الاسرائيلية من دخول بورفؤاد بأى تمن.. طيب هى القوات المصرية اللى كانت موجودة هناك اد ايه؟.. 18 مجند معاهم ظابط واحد برتبة ملازم واسمه فتحى عبدالله.. وهنا خد بالك من مقارنة القوات.. المفروض الـ18 جندى المصريين هيمنعوا 10 دبابات اسرائيلية معاهم قوات مشاه ميكانيكية وعربيات مجنزرة وطيارة استطلاع.. من دخول بور فؤاد.. يا ترى ايه اللى هيحصل؟.. هقولك.. قبلها بكام يوم كانت القوة المصرية دى.. اللى هما الـ 18 مجند.. وصلهم سلاح مضاد للدبابات من الاتحاد السوفيتى.. تقولى حلو.. يعنى جاهزين للمعركة أهه.. أقولك اتقل بس.. مش تعرف السلاح كان عبارة عن ايه الأول!.. كان عبارة عن RBJ7 مضاد للدبابات وده كان أحدث من الـ RBJ2 اللى بيستخدمه الجيش المصرى.. تقولى طيب ما سلاح حديث أهه والدنيا تمام.. أقولك السلاح الحديث ده اللى هو RBJ7 كان بقايا السلاح اللى استخدمه الاتحاد السوفيتى فى الحرب العالمية التانية.. يعنى الاتحاد السوفيتى بعت لمصر بقايا سلاح تم استخدامه من 20 سنة.. تقولى من الحرب العالمية التانية وبتقول عليه سلاح حديث ازاى؟.. أقولك لأنه فعلا أحدث من الـ RBG2 اللى كان الجيش المصرى بيتدرب فعليا عليه.. واللى كان الاتحاد السوفيتى برده هو اللى باعته لمصر.. وكان بقايا السلاح اللى تم استخدامه فى الحرب العالمية الأولى.. انت مدرك التسليح المصرى كان شكله ايه وقتها.. علما بإن اسرائيل فى الناحية التانية كان عندها أحدث ما توصلت إليه الترسانة العسكرية الأمريكية.. وعلشان أقرب لك الصورة أكتر.. الطيارين المصريين كانوا بيطيروا بطيارات ميج 17 وميج 21.. فى الوقت اللى الطيار الاسرائيلى كان عنده الطيارات الفانتوم.. والفرق لو تعلمون عظيم.. طيب بعد فرق التسليح اللى حكيناه ده.. ايه اللى حصل؟.. مجند من الـ18 مجند المصريين اللى المفروض هيمنعوا القوة الاسرائيلية من دخول بور فؤاد.. واسمه حسنى سلامه.. اكتشف ان سلاح الـ RBG7 اللى وصلهم معهوش ذخيرة.. فين الذخيرة يا فندم.. قاله هتوصل بكره.. وفعلا الذخيرة وصلت تانى يوم.. لكن اكتشفوا ان لا السلاح ولا الذخيرة معاها كتالوجات تشرح طريقة استخدامه.. خصوصا فى عملية التصويب.. فين يا فندم كتالوج السلاح.. اتضح ان الاتحاد السوفيتى مبعتوش.. يعنى مكنش مكفيهم انهم بيبعتوا بواقى السلاح اللى عندهم.. لكن كمان بيبعتوه بدون ما يوضحوا طريقة استخدامه.. وخد بالك ده نفس الموقف اللى عملوه لما مصر طلبت منهم سلاح دفاع جوى.. بعتوا مع السلاح خبراء روس علشان هما اللى يشغلوا منصات صواريخ الدفاع الجوى.. الخبراء الروس اللى طردهم بعد كده الرئيس السادات لو تفتكر.. بالبلدى كده كان بيبعت لك السلاح وبيقول بينه وبين نفسه يارب ما يعرفوا يستخدموه.. لكن المفاجأة ان الجندى حسنى سلامه واللى كان برتبة رقيب وقتها.. بعد ما مسك السلاح لقى ان في تشابه بين تلسكوب التصويب الخاص بالأر بى جى 7 وبين تلسكوب المدفع الرشاش 14.5 بوصه المضاد للطائرات.. واللى كان درسه واتدرب عليه سنة 62 فى مدرسة المدفعية.. فعلى طول بلغ قائد سريته انه يقدر مش بس يستخدم السلاح الجديد.. ده كمان يقدر يدرب زمايله عليه.. وهنا قاعدة مهمه من قواعد القتال.. وهى ان السلاح بالفرد وليس الفرد بالسلاح.. يعنى لو انت مقاتل أى كلام ومعاك أحدث سلاح فى الدنيا.. فانت ملكش قيمة.. ولو انت مقاتل كفاءتك عالية.. مش هيفرق معاك نوع السلاح اللى بتحارب بيه.. والنقطة دى هنرجع لها كمان شوية.. وفعلا خرج الرجاله علشان يقابلوا القوات الاسرائيلية.. وعند منطقة اسمها راس العش.. شافوا القوات الاسرائيلية على بعد 2 كيلو.. وشافوها دى معناها انهم شايفين بعض بالعين المجردة.. القوات الاسرائيلية بمجرد ما شافت القوات المصرية اللى هما 18 جندى وظابط.. وقفت علشان تنفذ عملية استطلاع.. حد من حضراتكم يقولى استطلاع ايه؟.. دول كلهم 18 عسكرى وظابط.. أقولك تمام.. تعالا نشرح النقطة دى.. الجيش الاسرائيلى معروف بإنه ملوش فى المواجهات المباشرة.. يعنى مهما بلغت قوته.. ومهما بلغ ضعفك.. ميواجهكش راجل لراجل.. أمال بيعمل ايه؟.. يبعتلك قوة تواجهك.. فتقوم تشتبك معاها.. لكن فى نفس الوقت يكون بعت لك قوة تانية تطوقك من ظهرك يمين وشمال.. بحيث ان انت حتى قبل ما تضرب طلقة واحدة ناحية القوة اللى بتواجهك.. تلاقى الضرب اشتغل عليك من كل اتجاه.. وبكده يكونوا قدروا ينهوا أى معركة لصالحهم فى أقل وقت ممكن وبأقل خسائر.. المصادر https://tinyurl.com/3r94xuer https://tinyurl.com/37hv4jk6 https://tinyurl.com/3mnzkuhj https://tinyurl.com/3mnzkuhj https://tinyurl.com/be28yejk #معركة_راس_العش #المواطن_سعيد #حرب_اكتوبر