Скачать с ютуб 【 в хорошем качестве

【

今日行政長官係立法會宣布新一份施政報告，等我同大家分享吓我嘅幾個睇法﹕ 1️⃣ 零售業📈📉 依家人人都話經濟市道差、零售行業水深火熱，咁實際情況係有幾差呢？我哋實政圓桌就做左「功課」，搵左由2005到2024年1月至8月香港零售業銷貨價值總額。睇返數據，2011年係2,600億，到2024年跌落2,500億。即係話，我哋唔單止未回復到2017-19年嘅水平，甚至仲差過2011年。 2011年嗰陣係乜嘢世界？當時私人零售業租金係$126/平方呎，今日則係$171/平方呎；14年時間，升左大約35%。而2011年零售、住宿同膳食服務嘅工資中位數係$8,500，今日係$16,000，工資升左88%。而根據統計處資料，2024年第一季（零售、住宿及膳食服務）勞動人口有52萬，佔整體勞動人口大約15%。 呢啲背景數字從來冇人研究同報道。面對今日咁差嘅局面，我哋要點解決呢？首先當然係行業自救，我哋唔可以繼續食老本，一定要創新產品同服務，提高性價比。至於政府，我哋一直都爭取內地客來港一簽多行，好高興特首肯聆聽我哋嘅建議，已經向中央政府提出，包括恢復深圳「一簽多行」同擴大「一周一行」個人遊簽注城市範圍。 我認為只係回復深圳戶籍居民嘅「一簽多行」係遠遠唔足夠，我希望下一步係成個大灣區城市都可以做到。至於大灣區以外嘅40幾個自由行城市，未來應該盡可能做到一周一行。如果可以落實，對香港本土經濟會有好大幫助。 2️⃣ 高端旅遊 盛事經濟🎇🌆 講到帶旺我哋個市道，政府可以做嘅就係幫我哋去搵新客源，吸引新嘅高端旅客。我哋實政圓桌講過要靠高端旅遊，因為高端旅客唔係淨係嚟打卡，而係會參加啲需要俾錢嘅活動，有經濟能力嘅。要吸引呢啲旅客，第一就要有新嘅旅遊基礎建設，對上一個已經要數到第一屆特首董建華引進嘅迪士尼。呢十幾廿年，除咗啟德體育園掹車邊算係，我都諗唔到第二個。我講過好多次要欣澳填海做賽車場，睇周邊有賽車場嘅地方就知嗰個都撈到盤滿缽滿！但係我講咗七年，影都冇，今次仲提都冇提。另外，我哋提出嘅南大嶼高端旅遊，就淨係講咗生態走廊，我聽到都驚，又係啲免費冇經濟效益、打完卡就散嘅嘢。完全冇提到有咩配套，點樣變成經濟活動。如果淨係整到個沙灘好靚就冇乜用，要將佢變成一個國際性景點，就一定要將佢產業化，帶動到經濟效益。如果做得好，我哋絕對有條件做到南中國海南島以外最大嘅Beach resort！所以政府要盡量引進好多中小型酒店，各有特色，喺一條好長嘅沙灘上有十間八間酒店，又有啲飛索、滑翔傘玩。啲人喺度玩完水上活動，又可以搭車好快到迪士尼，大家都喺大嶼山，淨係打通晒呢兩度都已經係天下無敵嘅Resort啦。 盛事經濟方面，我哋要分清楚邊啲幫到香港，邊啲為做而做。要俾錢嘅盛事經濟可以大搞，所以我哋今日好睇好啟德體育園，又可以做演唱會，搞國際性賽事，不過政府就要洗濕個頭，小心監管。好似出年Coldplay嘅表演，10幾萬張飛，過千蚊一張，眨吓眼就賣晒，七成半嘅套票係海外訂購。不過就要好小心監管，就算唔係政府主導，都要睇清楚啲細節，唔好到時又整個蝦碌嘢出嚟，交通配套俾人鬧、Coldplay又突然四個變三個，佢哋每個都有擁躉，少咁個盞俾人鬧。係冇新景點嘅前提下，啟德體育園係我哋嘅重中之重，呢個絕對可以幫到香港嘅盛事經濟、活化香港。 3️⃣ 高端醫療🏥 我哋圓桌一直要求政府要起第三間醫學院，今日終於有細節，仲超出我哋期望！估唔到今次唔係將洪水橋醫院作為教學醫院，而係喺北都牛潭尾預留土地，發展新醫學院校舍同新綜合醫教研醫院。雖然特首冇講時間表，但我就聽講願景係2035年前落成，到時就會有多間公立醫院服務北區市民。 另外屯門醫院而家已經爆晒棚，未來仲要搬更多人入去住，而第2間位於洪水橋嘅公立醫院就可以集中服務鄰近元朗、屯門嘅居民。我好有信心有咗呢2個醫院同醫學院，香港係高端醫療方面至少踏出方向性嘅一步！ 4️⃣ 英語水平📚 大家都知我好關注香港學童嘅英語水平。不過自2017年施政報告後，未有一屆特首再提過「英語水平」呢4隻字，而教育事務委員會上一次係立法會討論香港學生嘅英語水平，已經係2015年12月14日，即係9年前！我真係唔知香港點繼續做好「國際超級聯繫人」嘅角色喇～ 今屆施政報告同樣冇講「英語水平」，不過就有提會撥款約4.7億強化英語、普通話同其他語言嘅學與教。我真係搲爆頭都諗唔明🤯，語常會嗰語文基金去到舊年仲有73億結餘，佢哋更加從來冇交代過每年嘅KPI係咩，如果連呢73億都未諗掂點用，4.7億又可以用嚟做乜？政府不如督促語常會用好呢73億先！ 另外提升英語水平一定要靠學校去做，政府係咪都要講吓將來點發展同搵多啲外籍老師？但今次施政報告同樣提都冇提… 5️⃣ 「告別」劏房？🏠 國家領導人話想見到香港有朝一日可以告別劏房。我好欣賞李家超特首，佢好有智慧、好有勇氣咁回應左呢個訴求。一方面佢將唔合規格嗰啲叫劏房，需要取締。另一方面，佢好貼地，好有勇氣咁承認香港的確有呢啲處所存在嘅必要，將合規格嗰啲叫「簡樸房」，可以同中央領導人講好多人想住喺市區，就算政府有公屋，但係要搬去山長水遠嘅地方，為咗方便返工返學，佢哋都未必想去，所以合規格嘅「簡樸房」應該喺香港繼續俾佢生存落去，只要政府規管得好就得啦。不過，政府提出「簡樸房」規格，要求有窗有廁所又要80呎以上，條件好咗，租金就自然會上調，如果唔係邊個肯做呢？講到最後一定要有法例控制租金，所以政府應該盡快啟動制定起始租金嘅討論，保障基層住戶。 6️⃣ 交椅洲人工島🚆 交椅洲人工島終於實牙實齒，喺年底前會展開詳細工程，呢樣嘢一定要大讚！因為之前有聲音話交椅洲人工島要洗咁多錢，不如延後啲先至搞啦。呢個工程點解咁緊要呢？因為如果唔踏出呢第一步，第5條跨海鐵路同埋第4條跨海公路，永遠都只係得個「講」字！未來隨住北部都會區陸續落成，有幾十萬人會搬去新界北，佢哋去市區返工返學，到時有乜嘢交通配套呢？屯馬綫迫爆都唔得掂啦！