Скачать с ютуб Vietnam mi Serchhip District Jail atanga a tan hun hmang zova chhuak TNT-ah a awm zui rih dawn в хорошем качестве

Vietnam mi Serchhip District Jail atanga a tan hun hmang zova chhuak TNT-ah a awm zui rih dawn

#ZabilianZ Dec 18: Kum 2020-a Foreigner case-a Serchhip District Jail-a dahluh Vietnam mi Dahn Niang chu Jail-a tan hun tur a hman zawh hnuah awmna mai tur a neih loh avangin Serchhip atangin TNT, Aizawl panpui mek a ni. Mipa kum 25 mi Dahn Niang hi Centre for Environment and Social Justice (CESJ) hruaitu ten buaipuiin, Delhi-a Vietnam Embassy kuta hlan theih a nih hma chuan TNT camp, Aizawl-ah awmin, Social Activist Pi Vanramchhuangi chu a Guardian-ah a tang ang. Rilru lam leh taksa lama ruallo Dahn Niang hi April ni 24, 2020-ah Serchhip district jail-ah dahluh niin, dan lova ramdang mi lo lut thubuai siamsak a ni a. July ni 29, 2021-ah thiamloh chantir niin, kum 2 lung in tang tur leh Rs. 10,000 chawi tura tih niin, pawisa chawi tur a neih loh chuan thla hnih dang tan belh tura tih a ni. Jail a tan chhungin a nungchang that vanga remission neuh neuh a hmuh nen June ni 23, 2022 khan a chhuak thei tawh a, kalna tur a neih loh vangin Serchhip district jail ah an enkawl zui ta a. Ditrict thuneitute, Jail hotute leh Serchhip district CJM ten Home department nen tankawpin an buaipui nasa hle a. Eng ram mi leh sa nge a nih hre tur pawhin South East Asia-a ram hrang hranga Mizo missionary te bepawpin theihtawpin an bei a, a tawpa Vietnamese a ni tih an hre thei ta a. Home department-in Ministryof External Affairs lam hrilhhriain, Delhi-a Vietnam Embassy pawhin rei tak an beih hnuah Dahn Niang chu an ram mi leh sa ngei a ni tih leh Vietnam ram thintlang khaw pakhata cheng a ni tih an hre thei ta a ni. Vietnam ram passport an siamsak tawh a. Embassy lamin an lak theih hunah an ram lamah a haw thei tawh ang. Dahn Niang chungchangah hian Civil Society lam atangin Human Rights and Law Network, Mizoram te pawhin sawrkar hmalakna puibawmin MEA lam te pawh an lo be pawp a, Centre for Environment and Social Justice (CESJ)-in a awmna tur an dapsak a, mimal tlawmngaia enkawl lailawk thei pawh an awm laiin, TNT hotu ten inhawng taka an lo enkawl theih avangin lawmawm an tih thu CESJ chuan an sawi a ni. Covid hri lengin Mizoram a tuam chhoh tan lai April ni 1, 2020 khan E. Lungdar VLTF te duty-na hmun pakhat, Bazar kawnah mi pakhat a lo chhuak hlawl mai a. Khawchhak hmel a pu a, tunge a nih an hre lo. Mizo tawng a thiam lova, a hming lemah pawh COVID LALPEKHLÛA an ti ta ngawt mai a. E. Lungdâr khua a luh hma hian khawchhak lamah, Thekte khua ah luh a tum a, hri len lai a nih avngin an lo phalsak lova, heta tang hian Ṭiau lui dûng zawh thlain, Khuangthing VLTF duty ten an lo hmu leh a. Ei tur leh inthlakna tur thuamhnaw lo pein, ramri thleng an thlah a. Ramri chu kan ta lo chuan let lehin E. Lungdar khua chu a lut ta a ni. E. Lungdar VLTF ten hmuh hlima an check chuan a ipte-ah Burma pawisa ₹ 3,000 leh India pawisa ₹ 150, Kurtai kg chanve vel, Buiscuit tlem leh Torchlight te a ak niin an sawi a. Burma mi a nih ringin khaw chhûnga Burma lam mi te puna an han biak ngial pawhin Burmese ṭawng a lo hrethiam hauh lo mai. Râl lam hla tak chu a kawk ringawt mai ṭhin a; ṭawngtheilo niin an ngai hman hial a ni. E. Lungdar VLTF te inrawnkhawm chuan kawl rih phawt mai chu an titlu ta a, E.Lungdâr tlânga BSNL Building, Store Room atana an hman chu a riah nan an buatsaihsak zui a, khawtlângin an buaipui zui ta a. Medical Team lamin awngphah leh mutbu an tumsak a. A thuamhnaw thlaksakin an bualfai a, chaw ei tur thlengin VLTF in an ngaihtuahsak ta a. E. Lungdara a awm chhung hian tunge a nih hriat tumin a thlalak te thawn darhin a theih ang angin hma an la chho ta zel a. Rangoon-ah pawh an lo hmuh tawh thu te, a rilṭam avanga ei tur an pek thu te, Chinese ṭawng leh Thai ṭawnga biak a hriatthiam loh thu te leh, Home-a dah luh an tum pawha Home lamin an lo hnar dan te thlengin a chanchin chu an hriat belh ta zel a. Burma lam aṭanga rawn chhuk a ni tih chu a chiang ta phawt. Mahse Burmese ṭawng a thiam si lo. A nihna leh khawi aṭanga rawn kal nge tih an la hre thei lo! Amah lo hmu hmasa tawhtu ten Cambodian lam mi a nih an rin avangin Cambodia-a Missionary awm an hmelhriat te pawh an biak tir a, tawngtheilo emaw an tih chu a tawng ta a, a mi biak nen chuan ṭawng an inhre pawh vaklo chungin an biak tir Missionary chuan Vietnam lam mi a nih a rin thu a sawi ta a. Vietnam-a awm tawh hmeichhe pakhat hria an lo awm leh hlauh a, an biak tir a, thil pawh a sawi ve ta nual a. A hming, an khaw hming leh ram hming te pawh an hre ta a ni. Sorkar lam thuneitute pawhin tih tur tul ang te an ti zel a. Covid avanga inkharkhip chhung chu E. Lundar-ah enkawl zui a ni ta a. BSNL-a thawk, Pu Chawia te chhungin an buaipui ta chawt a, ei leh in an neih ang ang an kep a, VLTF lamin an ngaihtuahsak zel bawk a. An bual fai a, a thawmhnaw te an sukfai sak thin. East Lungdar khuain an lo buaipui dan zawng zawng hi a ropuiin an fakawm hle a ni.